Question

كيف اكتب سيرة ذاتية
السيرة الذاتية بمثابة المعرف على الشخص الحامل لها لأنها تحتوي على كافة معلومات وبيانات الشخص الحامل لها والتي تخص تفاصيله الشخصية, مثل بطاقة الهوية أو جواز السفر أو أي كرت تعريف بالشخص, حيث في طلبات التوظيف يسأل عنها الكثير من المؤسسات والتي تطلبها لمقابلات التوظيف, لذلك تعتبر السيرة الذاتية مهمة جداً لنا ويجب على الجميه إنشاء سيرة ذاتية خاصة به ليستفيد من خدماتها في حياته العملية, وهناك عدة أمور يجب ان تضمنها السرة الذاتية وهي :

الاسم بالشكل الصحيح باللغة العربية والإنجليزية (إذا تطلب الأمر) .
الصورة الواضحة للشخص صاحب السيرة الذاتية .
أن تحتوي على الشهادات التعليمية الخاصة بالشخص .
أن تحتوي على الخبرات والدورات التي خاضها الشخص .
أن تحتوي على الهوايات التي يبرع الشخص في ممارستها .
أن تحتوي على كافة تفاصيل التواصل مع صاحبها ( العنوان – البريد الإلكتروني – رقم الهاتف ) .
 

 

Answer 1

السيرة الذاتية بشكل عام هي تعريف بسيط عنك يعني أهم شي لازم يكون فيها بياناتك الشخصية التعريفية، و بعدين بيكون لازم تكتب عن أي دورات أو ورش عمل حضرتها وفادتك أو أي شي عملته وحضرته أضاف الك أي معلومات او مهارات جديدة.

وكمان لازم تكتب عن خبراتك يعني وين اشتغلت وبكل بند بتكتب اسم المكان اللي اشتغلت فيه و المسمى الوظيفي وسطرين بالكتير عن المهام اللي كنت تعملها

وباخر شي بتكتب المعرفين وطبعا لازم تكون ماخد موافقتهم انك راح تحط اسماءهم وأرقام أو ايميلاتهم في السيرة الذاتية.

بالنسبة للأشياء اللي اكتسبتها من كمية الوظئف اللي قدمتلها، هو انه غالبا ما بينفع تبعت نفس السيرة الذاتية لكل مؤسسة أو شركة، يعني كل سيرة ذاتية بدك ترتب المعلومات فيها حسب الوظيفة اللي حتقدملها و حسب الاعلان اللي بتقرأه، يعني بتشوف شو المهارات اللي طالبينها في الاعلان و بتحاول اعادة صياغتها في سيرتك الذاتية .

يعني مثلا ما بينفع تقدم لوظيفة موظف علاقات عامة نفس السيرة الذاتية اللي بتقدمها لوظيفة مساعد إداري،

وبالنسبة للنماذج المستخدمة، أنا شخصيا بفضل السيرة الذاتية التقليدية البسيطة اللي انت بتكتبها على ملف وورد وبتعمل تنسيقها بحيث يكون بسيط أما النماذج المبهرجة واللي بتكون مصممة وفيها حركات وألوان و اشياء متل هيك أنا شخصيا عمري ما اقتنعت فيها ولا حقتنع فيها و صدقوني اللي بيختارو الموظفين ما بتلفتهم هالقصص اللي بيلفتهم هو شو انت عندك خبرات ومهارات أكتر

وكمان يفضل أنو السيرة الذاتي ما تكون أكتر من صفحتين والا طبعا ما حدا راح يغلب حاله و يقرأها

وبالنسبة لفقرة الهوايات اللي بعض الناس لليوم بتدرجها بالسيرة الذاتية أعتقد أنها راحت موضتها وأكيد مافي أي صاحب عمل بيهمه ان كنت بتعرف تسبح و تركب خيل نهائي

أما بالنسبة للصورة الشخصية ، ممكن تحطوا صورة شخصية رسمية بالزبط متل صورة الهوية الشخصية أو جواز السفر مش مطلوب أي مبالغة أو بهرجة

وبعض الملاحظات المهمة ، انه لازم يكون عنوان الايميل اللي في السيرة الذاتية هو الاسم الشخص وممنوع كليا الاسماء المستعارة متل همس المشاعر و زهرة نيسان و هالقصص.

وأكيد مش لازم تكتبه أي معلومات مش حقيقية بس عشان تحصلوا على الوظيفة لأنه لو اختاروكم ورحتوا عالمقابلة راح يبين هالشي و هيك بتكونوا بتقضوا حتى على أي فرصة مستقبلية الكم في هالشركة أو المؤسسة لانه راح يترك انطباع سيء جدا عنكم

وبالنسبة لسؤال أنه هل يفضل تكون السيرة الذاتية باللغة العربية او الانجليزية، هالشي بيعتمد على المكان اللي حتبعتله السيرة الذاتية تبعتك ونوع الوظيفة والاعلان اللي قرأته، يعني مثلا مش منطقي تكون مدرس لغة عربية و بتقدم لوظيفة في مدرسة و تبعت السيرة الذاتية باللغة الانجليزية، ولما بتراسل شركات أو مؤسسات دولية طبعا لازم ترسل السيرة الذاتية باللغة الانجليزية.

وبالنسبة لنوع الوظيفة يعني مثلا مركز طالبين مدرب لغة انجليزية مش منطقي ترسل السيرة الذاتية باللغة العربية، وغاليا لما يكون الاعلان اللي قرأته باللغة العربية يفضل أنه ترسل اليرة الذاتية باللغة العربية والعكس.